Запрашаем у Блізніцу на Юр'еў дзень

А ці ведаеце вы, калі прыходзіць сапраўдная вясна?

6 мая па беларускай народнай традыцыі святкуецца Юр’еў дзень – сапраўдны пачатак вясны. “Юрай зямлю адкрывае, расу выпускае!” – так казалі нашы продкі. Святы Юр’я – “Божы ключнік”, бо ў яго знаходзяцца ключы, якімі ён замыкае зіму і адмыкае вясну, выпускае расу, благаслаўляе ўсё навокал: зямлю, людзей, жывёл.

6 мая запрашаем у аграгарадок Блізніца Полацкага раёна на свята народнага календара Юр’я “Як на Юр’еву расу”. Пачатак а 7-ай гадзіне раніцы.

Жыхарам і гасцям аграгарадка Блізніца і ўсяго Вароніцкага сельсавету, кіраўніцтву і працаўнікам ААТ “Блізніца” прапануецца прыняць удзел у свяце па мясцовых звычаях.

Каб здароўе прыбыла і шчасце, каб добрым быў ураджай у гэтым годзе, трэба абавязкова ўмыцца свежай расой, а яшчэ лепш – пакачацца ў ёй. Бо ў Юр’еў дзень яна мае незвычайную сілу! Пасхальнае яйка трэба абавязкова закапаць ў зямлю, каб новы ўраджай быў лепшы за леташні.

Даяркам, пастухам і іх кароўкам асобая павага. Даярачкам  -  па яечку, каб іх кароўкі былі заўсёды кругленькія, сытыя і цэленькія, як гэтыя яйкі. А пастухам – традыцыйную яечную кашу, каб дужэйшымі і трывалымі былі.

Усіх жадаючых прыняць удзел у “Юр’еўскіх карагодах” і дакрануцца да нашых мячцовых традыцый запрашаем у Блізніцу!